Antwort an de dusselige Uffgleber Darmstädder und Frangfodder: Nur uffresche, net kloppe!
Mehr als 150 Journalistinnen und Journalisten berichten rund um die Uhr für Sie über das Geschehen in Deutschland und der Welt.
Zum journalistischen Leitbild von t-online.
News folgen
Des was einische von denne Frangfodder Fans uffgeglebbt habbe in de letzde Daache, des hott annere mol so gar net gefalle. "Darmstadt vernichten" hott do gestanne, unn "Lilienschweine jagen". Leud, des is doch noch net e mol Hessisch. Unn vor alle, des is aach net die hessisch Art. Des hott sich aach de Nachtsheim Henni gedenkt (den kenne Se bestimmt vom "Badesalz" Comedy-Duo, also die, wo da so Spass mache tun) und hott mit em Apitz Michael en eijene Uffkleber beim Facebook geschriwwe. Weil de Henni nemmlisch net so en Dabbes is wie die ganse uffgeblosene Lumbeseggl, die sich am Sunndaach nur kloppe wolle.
Klar saacht de Henni: Mer kenne uns uffresche, mer kenne motze unn aach mol de annere veraasche. Jo. Awwer nach em Spiel im Waldstadion gehn mer noch zsamme uff de Weihnachtsmarkt oder in de Wertschaft. En Schoppe dringe, ne Worscht esse. Unn gut is die Sach.
Lewwe un lewwe lasse
Die Eintracht hott dodemit nix zu schaffe gehabt, saacht de Apitz, der des Ding gemolt hott zu dene Schreiberlinge vom "Echo". Des is wos, des kimmt aafach aus dere Fan-Seel naus. Rescht hadder. In Frangfordd saacht mer nemmlisch als noch: Lewwe un lewwe lasse.
.
